PM-USHA scheme Component pahnih: Grants to Strengthen Colleges leh Gender Inclusion & Equity Initiatives hnuaiah College te thuamthatna tur hna (works) thawk tur thlanna atan August ni 11, 2025 khan Open Tender chhuah niin Govt. Empanelled Firm ‘Grade A’ zawng zawngin an dil thei a ni, an ti a.

Heng hna hlawm pali (4) a Tender chhuah te chhang a bid thehluh dan chu hetiang hi a ni: Govt. Johnson College -  6 nos, Govt. Lawngtlai College - 3 nos, Works in Colleges of Lunglei Districts - 4 nos, Works in Colleges of Aizawl district - 3 nos. niin August ni 22, 2025 - ah technical bids hawn a ni a. Tender document envelope kawm a thu ziah dan tur chungchang kaihhruaina tender document ziak a tar lan leh sample-ah thil inang lo hret a awm avangin a kawm a thu ziak chinah chuan harsatna siam lovin firm-te hnen atanga bid dawn zawng zawng pawm sak vek an ni a. Envelope sealed dan pawh thalhrit (waxed &brass seal) hmang leh hmang lem lo, cello tape a char te pawh pawm vek an ni, tiin an tarlang.

H&TE department chuan, Envelope chhunga awm tur leh en hmasak tur Technical bid erawh chu hawn a nih hnuah uluk takin Bid Evaluation Committee-in a endik a.  Tender document in a phut ang thlapa tender ti fel lo (i.e acceptance atan Signature leh date dah kim lo) te hnawl an ni a, Works tender 4 ah hian firm pakhat theuh chauh Technical Bid valid an awm phah ta a ni. Para 47 of ‘The Mizoram Public Procurement Rules 2020’ anga Single responsive bid kaltlang pui theih nia, a lan avangin department chuan financial bid hawng lehin State Work Advisory Board ngaihtuah tura thlenin meeting koh a ni, an ti.

Firm/contractor tling ve ta lo (invalid bidder) te hian ‘Sealed Tender’ hrilhfiah a nih dan leh tender ‘Due Date’ chungchangah lungawilohna an neih avangin Assembly Petition Committee lamah an complaint-na leh re-tender tura ngenna chu September ni 16, 2025 khan an thehlut a. Hetih lai hian firm Technical bid valid nei te hian Assembly Petition Committee-ah re-tender lo turin ngenna an thehlut ve bawk tih hriat a ni, an ti.

Assembly Petition Committee hian ni October ni 8, 2025 khan Department Official te koin discussion neih a ni a, H&TE Department atangin Officer 4 an tel a ni, an ti bawk a.

Assembly Petition Committee Report copy hi Department in a dawng tawh a, Committee recommendation leh Report a thuziak nena inmil hauh lovin thil sual lian tak awm anga thu a thang ta vak mai hi a pawi kan ti hle, tiin an tarlang.

H&TE department chuan, PM-USHA hnuaia firm selection chungchanga lungawilohna nei firm ten complaint an thehlut a ni mai a, sum kal dan fel lo engmah a awm lova, Petition Committee Report ah pawh sum kal dan fel lo lam thu ziak engmah a awm lo. He hna pali (4) atan hian sum ‘sanction’ dawn a la ni lo a, chingpen emaw kal fel lo tur a la awm lo hrim hrim a ni, an ti.

Kan sawi ang khian heng Project works tuna tender tihchhuah atan hian Central atangin sum lo kal a la awm lova, Project Approval Board in PM-USHA fund hmu turin approval a pek hnuah DPR te siama thehluh a ni a. Hna thawk tura firm thlan a ngaih avangin open tender chhuah a ni. Sum lo kal tur hi chu Mother Sanction la nghah mek niin sum tih chingpen emaw sum kal danah fel lo engmah a awm lo tih Mizoram mipuite kan hriattir e, tiin an tarlang.